$1有找免翻牆大陸SIM 逐日買好方便

北上要買SIM卡嘅最大原因係免翻牆，WhatsApp/Facebook都用得！先前用開SoSIM $33/5日分開用，除返$6.6一日（500MB後限速）已經唔錯。不過原來有方法，可以$1有找就買倒一日（都係500MB後限速） 是咁的，想玩呢個Promo要有2個條件。 1. 有一部Support eSIM嘅智能手機 2. 有AlipayHK Account 首先，AlipayHK入面嘅Reward+有簽到活動，7日為一個Cycle，每個Cycle第一日簽到，都係送Trip.com $5 Coupon（買滿 $5.1 就可以用）。 咁Trip.com 就有大陸 eSIM賣，有幾款的，最平嘅係$5.84(會因應匯率浮動 $5.8～$5.9） https://hk.trip.com/things-to-do/detail/60222830?locale=zh_hk 最快可以揀明日出發，用AlipayHK俾錢就可以扣嗰$5 Coupon，亦即係$0.84就有交易。eSIM可在收到Trip.com提供QR code email的30日內用，如果今日買、揀6月出發，trip.com係唔會咁早send QR Code俾你。 我後備機係iPhone SE3，北上前/後，連接Wi-Fi，用手機Scan/Cap圖讀Trip.com Email入面 eSIM QR code就可以裝。 裝完其實係一張CMLink eSIM，即時啓用，收中國移動4G/5G，開數據漫遊就可以上網，但唔好嘅係呢款eSIM唔會有提示SMS，唔會話你知就爆500MB。