「白銀亭」呢間咖喱專門店係2023大阪米芝蓮必比登推介之一。由於營業時間好短同埋咖喱賣晒嘅話就會收檔，上年十月去大阪嘅時候抽唔到時間去試。 店鋪11am開門，我哋10:45am到達已經有10個人係我哋面前排隊。數過人頭只要係喺16位內就一定入到第一輪😮‍💨店內空間唔大，用餐位置高枱圍住中間係一個開放式廚房，師傅就不停炸豬扒炸蝦及準備食物。另外兩位店員就負責落單、清潔、埋單等工作。 入座後望望掛喺牆上面嘅餐牌，選擇只有四款咖喱，可以另加錢要配料或白飯。我哋兩個選擇少飯(同店員講聲就可以)，除咗唔習慣一早食咁多飯之外仲怕食唔曬會浪費食物😅 由落單到上菜不消5分鐘，送上我面前嘅咖喱飯係熱辣辣，炸豬扒係睇住師傅從炸爐裡面夾起、切件再放喺白飯上面。師傅喺時間方面控制得好好，確保每一位客人都可以食到熱辣辣嘅咖喱飯。 呢間賣嘅唔係日式咖喱所以味道偏辣，唔係個個人都可以接受到。如果覺得味道太辣嘅話不妨將醃蘿蔔撈入咖喱飯食，感覺會冇咁辣㗎。我點餐嘅時候加咗隻生蛋黃，撈炸豬扒食好正！ ▫️トンカツカレー (炸豬扒咖喱飯) - JPY950 加生卵JPY50 ▫️トンカツカレ(JPY950) 加エビフライ(炸蝦一隻JPY150 ⭐️只收現金 ⭐️有英文餐牌提供 ⭐️另有分店。榮獲米芝蓮必比登推介嘅係呢一間