深圳本土品牌「順意·順德家鄉菜」

🌟餐廳:順意·順德家鄉菜 📍地址:梅園路75號萬象食家5層L517號 今次介紹呢間深圳本土品牌「順意·順德家鄉菜」,主打新派順德菜,主要食材90%均來自順德水鄉田園,並由真正順德大廚掌勺,為食客帶來原汁原味既地道順德菜! 🔹菊花八寶魚蓉羮 賣相及擺盤都好精緻!湯羮配以燭臺上菜,每一啖保持熱辣辣!入口啖啖魚蓉鮮味,湯羮熬煮至濃稠,真材實料!上層加入菊花花瓣,搭配湯羹一齊進食,鮮味更突出! 🔹鳳城煎三寶 傳統既廣東小食,鳳城煎三寶。包含魚肉釀青椒、煎墨魚餅及蓮藕餅,各有特色~ 我就最鍾意香煎蓮藕餅,蓮藕粒及豬肉粒口感爽脆,外層煎至金黃卜卜脆,好正! 🔹順德卜卜蜆 呢款順德卜卜蜆,鑊氣十足,份量豐富! 大大煲卜卜蜆以九層塔及醬料再加入薑蔥蒜辣椒等爆炒,以砂煲上菜,熱辣辣香噴噴!加上卜卜蜆嘅蜆肉好新鮮,鮮甜味濃,夠曬惹味~ 🔹特色蒸龍躉 賣相夠曬精緻,更突顯師父既刀工! 原條龍躉起肉,清蒸原汁原味,火喉剛剛好,魚肉鮮嫩結實,鮮味十足,搭配蒸魚豉油及薑蔥絲,大推! 🔹順心順意撈雞 餐廳招牌菜式之一! 手撕雞嘅雞肉嫩滑,擺盤派場十足,店員協助加入薑、蔥、花生、芫荽、麻油、檸檬葉絲等多種材料後,撈起撈起,撈至風生水起,既美味又好意頭,材料豐富,層次感十足! 🔹基圍蝦炆清遠黑棕鵝 呢款菜式集農家菜及海鮮於一身既菜式,家鄉味濃厚! 基圍蝦啖啖肉,夠鮮味,再混合農家清遠黑棕鵝炆煮,呢款煲仔菜味道濃鬱!而且鵝肉夠香,啖啖肉,食得好滿足! 🔹 XO醬炒陳村粉 陳村粉亦係廣東特色菜式之一~ 陈村粉夠粗身,口感滑嫩,加入XO醬翻炒,色香味俱全! 🔹 上湯桑葉 呢款上湯桑葉,夠營養又健康! 桑葉口感爽脆,以清湯煮制,啖啖清新,纖維感豐富幫助消化~ 🔹 順德雙皮奶/芒果雙皮奶/紅豆雙皮奶 最後點少得嘆埋順德最具特色既雙皮奶甜品~我哋就揀咗三款,分別有紅豆雙皮奶、傳統順德雙皮奶及芒果雙皮奶,雙皮奶好香滑,入口奶味及豆味超濃鬱,口感綿滑,夠曬滿足! 👅 餐廳佔地面積寬敞,樓底夠高,用餐氛圍一流,環境簡約舒適,更有獨立私饗包間~食物方面,主打各款既傳統又創新既順德小菜,選擇眾多,而且每款賣相及擺盤別具心思!加上大眾點評、美團、抖音等都有推出優惠套餐,人均150左右,豐儉由人~ 值得一讚係餐廳嘅員工,態度親切而且殷勤有禮;而且人流不絕,晚飯時間全場爆滿,深受深港食客歡迎,鍾意食中式家鄉菜嘅朋友,值得一試!

地址
梅園路
中國广东省深圳市福田区八卦食街梅园路H463 QQV 邮政编码: 518029
評分
4/5
下一篇載入中