仍須努力

唔知點解以前喺附近做咗幾年嘢但我冇留意到呢度有間專門食餃子嘅地方。一定係我自己敏感度不足。唔緊要啦今日有事過嚟做，都可以試到嘞。 我好彩差唔多兩點去到，食晏人潮開始散去，唔太多人所以我一條友坐好闊落嘅4人卡座。然後我見都係有個notice喺牆：逢星期一至五嘅繁忙時間即係十二點到兩點，佢哋係唔提供煎餃嘅！！！我都明嘅，因為其實湯餃就冇咁花心機同時間煮但係煎係要全程睇實個火。即係如果我早些少嚟都焗住要嗌湯餃。 佢湯底係fix咗，係花膠淮山豬骨湯，但我真想食煎餃，因為我喜歡香口嘢。佢有個餐係八隻煎餃跟一碗細湯，咁就滿足到我想食煎餃但又試到佢湯嘅願望。我再貪心啲，加三蚊就可以拼兩個口味嘅餃，我就揀咗鮮肉咖哩薯仔同雞肉冬菇木耳兩個味道，不過上天可能唔鍾意我做人太貪心，所以就罰我食到一款好食嘅餃但又食到一款唔夠好食嘅餃。 啲餃其實好快就嚟到喇，煎得都幾靚幾勻循，但係其實睇唔出佢咩口味，一樣樣嘅，冇所謂啦都係我這一個人食啫。 第一隻咬開嘅係雞肉冬菇木耳，呢隻好食，質地係雞肉冬菇軟熟咗夾雜蔬菜嘅爽口，而且都幾香。第二啖咬開嘅係另一款味，但，咪住先，咖喱嚟，但好淡，我未食過噤淡嘅咖哩，同埋亦唔係我想像嘅軟綿嘅薯仔粒或薯茸......但都可能係我屋企附近嘅一間外賣餃子店「餃里」縱壞咗我嘅味蕾，因為佢哋個咖喱餃好香濃，係正到我奄尖嘅爸爸都話好味嘅。咁今日海樂呢款咖哩餃就失分喇。 好在佢碗湯好味又攞返啲分，因為身體問題其實我係唔應該飲老火湯，但因為佢呢個唔大碗，少少咁，我飲咗過吓口癮，更顯滋味。 總括嚟講都會有下次但我就一定唔會嗌返呢款咖哩嘅餃，係都試下鮮肉韭菜啦，睇menu呢款係佢哋no.1餃子嚟咖噃。 #龍重登場