高質土耳其美食異國風情Cafe-Lonely Paisley

啱啱嘅週末試咗人生第一次嘅土耳其菜，覺得好特別又有驚喜! 呢間土耳其餐廳係位於深水埗嘅福華街，雖然外面睇只係似普通cafe, 但入到店內卻係充滿異國風情。😍 首先入到餐廳就會被右邊牆身的大型異國花紋組成的雀仔形壁畫吸引住眼球，而前面係有三個獨立的大座位平台，上面鋪咗好靚不同顏色花紋嘅地氈，同放左細嘅四方枱給客人用餐，有啲似日式榻榻米座位，朋友聚埋屈膝坐係上面🤩 係一個好靚嘅打卡嘅位。 店前嘅大落地玻璃讓餐廳光線充足，令人感到好精神舒服。而店舖裝修同環境，都好有土耳其風情！再行入去係長枱區，而後面嘅牆壁都掛滿咗色彩鮮艷嘅地氈配襯小型藝術玻璃吊燈，另一邊牆身掛滿土耳其風景相，令整個餐廳好有活力同熱情。 ～ 土耳其烤雞肉卷 $78 土耳其烤雞肉卷係捲餅包住烤雞肉片、蘿蔔絲、生菜絲，仲有沙律醬，夾埋一齊，再切成三大嚿，放在金色的碟上，擺盤好靚！🤩 雞肉烤得香口，啲蔬菜好脆口，夾埋醬汁一齊食好開胃，作為前菜真係好適合。😋 ～ TURKISH BREAKFAST $148 呢個土耳其早餐真係勁有驚喜！真心推介！無論係餐具，餸菜擺盤非常之有心思，非常靚！😍 土耳其早餐嘅食物好豐富包括左沙律，芝士，土耳其特色芝麻包，仲有好特別嘅煎太陽蛋拼香腸片。另外仲有一杯佢地特色嘅土耳其紅茶配蜜糖棒，可以按自己鍾意嘅甜度加入蜜糖棒！🤤 而芝士有三款，由絲狀嘅芝士食起，到三角細粒， 最後係一塊塊有燒過表面嘅芝士。味道也是由淡味順住變越來有咬口同濃味。一次過滿足唔同口感。 而其中覺得最好味嘅就係芝麻包，新鮮出爐好夠熱，表面香脆，入面勁鬆軟煙靭，好似食緊油炸鬼咁，真係好好味。而且佢仲配左四款不同醬料，有杏桃醬，無花果醬，木梨果醬、同辣蕃茄醬，每個醬都有不同味但同個包都好配👍🏻。而我特別鍾意杏桃醬，杏桃味好出又清甜，同個包好夾！😋 真係覺得Lonely Paisley係一個好值得去品嘗嘅餐廳。店舖裝修同環境帶嚟一種迷人嘅土耳其風情，食物又好味，每一個菜都好有土耳其嘅風味同特色，真係有啲想去土耳其一轉😂🛫 Lonely Paisley 深水埗福華街182-186號怡華閣地下A號舖 推介度：⭐️⭐️⭐️⭐️⭐️/5⭐️ #旅遊 #土耳其菜 #cafe #Turkishbreakfast #LonelyPaisley #土耳其 #深水埗 #熱門菜式 #打卡 #chill #下次要再食