🌟餐廳:家全七福

🌟餐廳:家全七福 📍地址:尖沙咀中間道15號H Zentre 7樓 💰價位:~$200 - $400 ⏰營業時間:星期一至日11:30 - 15:00 / 18:00 - 22:30 📱電話:23613363 識我既朋友仔都知道我好鍾意食中菜,尤其係傳統既中式佳餚,今日就黎到「家全七福」尖沙咀分店 ,一嚐餐廳主打嘅巧手精緻中菜~特別一讚環境寬敞樓底高,空間感足,而且店員親切有禮~ 🔹燒味雙拼 (蜜汁叉燒+脆皮燒腩仔) 由細到大都好鍾意食明爐燒味~今次揀咗兩款餐廳主打既蜜汁叉燒同埋脆皮燒腩仔~ 蜜汁叉燒肥瘦適中,外層嘅蜜汁香甜,叉燒嘅肉質口感一流,散發陣陣玫瑰露香氣! 脆皮燒腩仔外皮卜卜脆,鹹鹹香香,肉質咬落Juicy軟腍,口感一流~ 🔹當紅炸子雞 炸子雞係好考功夫既菜式~ 先將新鮮雞吊乾,再慢慢淋上滾油炸熟,呢個做法先可以令到雞嘅外皮香脆,而內裏嘅肉質依然保持嫩滑!呢款當紅炸子雞,外皮夠薄夠脆,雞肉鮮嫩多汁,再搭配酸酸嘅檸檬汁,入口更解膩更清新! 🔹蔥花皮蛋圍蝦炒滑蛋 再嚟一道家常小菜~ 蝦肉加入皮蛋及雞蛋炒香,材料豐富,層次感十足,炒蛋夠嫩滑,搭配爽彈嘅蝦肉,食得好滿足! 🔹竹笙扒豆腐 呢款竹笙扒豆腐健康得黎仲賣相一流~豆腐超香滑,豆味出眾,再加入爽脆多汁嘅竹笙同菜心,搭配一層薄薄嘅芡汁,入口滑順,夠晒營養~ 🔹南乳炆粗齋煲 煲仔菜亦係中菜特色菜式之一!上菜時已經聞到陣陣南乳嘅香氣,材料豐富,有齊腐竹、草菇、豆腐、木耳、西蘭花及粉絲,包羅萬有,南乳汁鹹鹹香香,令人回味! 🔹福建炒飯 食中菜又點少得叫返個中式炒飯~呢度嘅福建炒飯真材實料,加入蝦肉、瑤柱、蛋白及菜粒炒製,夠哂足料,飯粒粒粒分明,我就最鍾意上層嘅芡汁,係福建炒飯嘅靈魂,好出色~ 🔹 蛋白杏仁茶 呢度嘅傳統中式糖水製作認真~我揀咗蛋白杏仁茶,清甜得黎蛋白仲好嫩滑,杏仁既味道又夠突出,飲完好暖胃,大滿足~ 👅整體小總結 餐廳環境開揚,用餐氛圍一流~ 食物方面,主打各款精緻巧手中菜,提供燒味、片皮鴨、煲仔菜、頭盤小食、鮑參翅肚及海鮮,食物種類夠晒多元化~ 值得一讚係餐廳嘅員工,態度殷勤有禮,經常主動為客人添茶及介紹菜式,抵讚!

地址
H Zentre
香港尖沙咀中間道15號
評分
4/5
Nice
下一篇載入中