打橫行嘅晚餐!

大閘蟹同辣嘢不嬲都唔係我最[飛佛]但係老婆大人鍾意我當然本咗條命都陪佢食!所以呢晚我哋去咗食大閘蟹加川菜所以佢開心到爆炸。 揀咗去K11 MUSEA嘅鄧記川菜呢間川菜館同我之前去過嘅有好大分別,入面嘅裝修好型仔唔講真係唔知佢係食中菜,仲有個勁正嘅酒吧同埋開揚嘅維港靚夜景,咁嘅配套嚟呢度食飯真係冇得輸啦。 我哋今晚10個人就係喺呢間房度開大餐,地方夠晒大而且我哋咁嘈啱晒啦哈哈哈。 乜嘢都唔好講住整返杯正嘢飲下先!呢杯叫做陽澄湖酒香尋唔講你唔知呢個係用花雕整出嚟嘅雞尾酒,個杯邊仲黐滿話梅同埋陳皮粉,記住唔好用飲筒就會飲到又酸又甜又香酒味嘅正嘢,好味到我飲咗兩杯啊嘻嘻。 有靚酒梗係要有啲送酒嘅小食嘅!枱面呢個香脆花生炸黃豆要來送酒一絕。 人齊可以上菜我哋嗌咗大閘蟹套餐因為唔使煩吖嘛!呢個大閘蟹套餐有成九個菜咁多今晚飽囉! 前菜有三碟呢一個係涼拌墨魚,唔食得辣嘅我都覺得呢個涼拌墨魚唔算好辣,墨魚條食落去仲好香好軟勁醒胃。 想清爽啲呢一個蒜汁秋葵就啱晒喇!好鬼鍾意秋葵外面脆脆入面黏黏嘅口感唔知你哋又欣唔欣賞呢。 跟住呢個就啱晒我因為係鮮椒子薑牛舌,又香又軟嘅牛舌好濃味不過我食嘅時候一定要撇開啲辣椒!下面嘅子薑就啱晒老婆大人食。 我哋每人都有碗海椰皇燉玉竹老雞湯,熱辣辣嘅靚湯又香又甜梗係好味啦。 我哋每人都可以有一隻五両半重嘅大閘蟹公,以揀清蒸或者花椒煎焗我同老婆大人梗係每樣要一隻啦。 雖然我唔係好鍾意食大閘蟹嘅膏!但係老婆大人搣到咁樣俾我食幾唔鍾意都覺得又甜又好食,不過講真呢隻大閘蟹嘅肉真係好鮮甜嘅,啲膏咪交俾老婆大人幫我搞掂佢囉。 花椒煎焗大閘蟹比佢打破晒我嘅固有思想!原來用花椒焗嘅大閘蟹可咁甘香咁正,面頭一粒粒嘅花椒記住要食埋佢啊,好似食緊小食咁脆卜卜勁過癮。 蟹粉豆苗蟹粉拆得好企理全程冇食到有蟹殼,仲要一啲腥味都冇剩係得鮮甜甘香嘅味道加埋啲嫩口豆苗正呀。 和牛粒麻婆豆腐,唔食牛肉嘅老婆大人都要嗌個白飯嚟撈豆腐食,咁你哋就知道呢個麻婆豆腐幾好味啦!對我嚟講係辣咗啲不過撈飯食都可以嘅,最重要係啲和牛粒真係好香好好味勁正。 花膠蟹粉拌麵蟹粉拌麵已經夠豐富加埋啲花膠更加唔得了!師傅好鬼細心仲整多碗雞湯絕對唔會怕乾。 傳統薑汁湯圓食完寒涼嘅大閘蟹要嚟暖胃就一流,再加多兩粒胖胖嘅湯圓想唔飽都幾難。

地址
鄧記四川 Deng G Sichuan (K11 Musea)
Shop 412-413, 4/F, Swatch K11 MUSEA Victoria Dockside, 18 Salisbury Rd, Tsim Sha Tsui, 香港
評分
5/5
😋
Hey
下一篇載入中