由日本藉主廚坐鎮既三日月，鐵板燒餐廳😍

忙咗成個星期，HAPPY FRIDAY BOOK咗由日本藉主廚坐鎮既三日月，餐廳位於尖沙咀，之前食過幾次，水準高之餘侍應友善又有禮，每次去食都好開心，飽飽捧住個肚返屋企～ 今晚一早BOOK咗位，可以坐BAR枱位置，近距離睇到主廚既烹調過程，又可以直接交流，開心！！ 前菜三小點賣相精緻好吸引，煙燻雞肉刺身鮮嫩粉紅，入口嫩滑軟腍，帶點煙燻香；麻醬豆腐豆味香濃，淋上麻醬加添香甜味道；日本漬鮑魚片鮮爽彈滑；海葡萄沙律令我諗起上次去沖繩旅行，海葡萄鮮甜又清脆，沙律菜新鮮好爽口，再配酸甜醬汁特別開胃。 極上刺身有牡丹蝦、赤身、油甘魚刺身，厚切好肥美，牡丹蝦蝦味特濃好香甜，鮮爽中帶軟糯；赤身軟中帶綿，風味濃郁；油甘魚肉厚滑嫩，油花散佈均衡，充斥魚油香氣。 日本帶子 手掌咁大既帆立貝來自日本北海道，配以香草牛油汁、檸檬汁同煮，肉質細嫩清甜，豐厚肉身極富彈性，底有翠嫩菠菜，調味剛好，好香甜。 茶碗蒸 用上鰹魚湯高湯製成，特別加入黑松露油，入口有濃濃蛋香，再散發淡淡松露香，底部有黑木耳絲，爽脆有咬口。 侍應奉上餐廳自家調製既三款醬汁，方便配肉類同食，好貼心！左邊係酸汁、蘿蔔蓉、蔥花，中間係自家制味噌醬，而右邊係芝麻醬。 日本A4和牛薄燒卷 A4和牛來自日本鹿兒島，油脂均勻、脂肪紋理細緻，入口細嫩柔軟又多汁，包裹住金菇、蔥等等，惹味香口～伴碟則有鐵板燒蓮藕、蕃薯片、蘆筍、蒜片等，相當豐富！ 澳洲龍蝦 重頭戲就係呢款澳洲龍蝦，大大隻勁吸引，望住師傅經過多重工序再煎香蝦肉、製作醬汁等，真係睇到大家都目不轉睛，好似睇緊SHOW咁，日本藉主廚真係好厲害！！ 龍蝦肉鮮美彈牙，肉質軟嫩，食用時再沾上經蝦膏提煉之醬汁，鮮味滿分！擺盤賣相又靚，絕對係色香味俱全，超出色！ 鐵板炒飯 食鐵板燒點少得鐵板炒飯，今次主廚更特別加上海膽於面頭，超吸引，見到都流口水！！炒得顆粒分明，軟硬適度，鹹鮮爽口，蛋香撲鼻而來，加埋面頭既鮮甜海膽，入口軟滑即溶，好快就比我食哂成碗！ 澳洲龍蝦味噌湯 湯頭濃厚鮮甜，濃厚蝦味令湯既味道特別鮮美。 白桃雪葩 雪葩充滿桃香，香甜清爽透心涼。