日式新滋味@中環街市街

呢日最有驚喜嘅相信係呢間竹麓拉麵，嗰日仲要見到佢哋嘅創立人竹麓輔先生添！呢度除咗有拉麵食之外仲有好多特色嘅小食，我試咗唐揚雞件、黑豚肉餃子、串燒免治雞肉棒三款都係水準之上，而且價錢唔貴認真食得過。 唔鍾意食拉麵嘅可以試呢個牛脂和牛飯，香到一個點嘅牛油味真係好鬼死邪惡！唔使50蚊就食到我覺得超抵呀。 鍾意食拉麵嘅就有三樣選擇有和牛鹽風拉麵、九州豚頭背脂拉麵同埋名古屋雞白湯拉麵！雞白湯拉麵好鬼香濃，配埋嗰件口感好特別嘅慢煮雞叉燒係吸引嘅，至於拉麵口感對我嚟講係幾唔錯唔會太腍又唔會太硬，至於呢個九州豚頭背脂拉麵個湯頭好濃郁，鍾意食豚肉嘅朋友真係要試吓。 講到我最鍾意嘅一定係呢個和牛鹽風拉麵！佢哋用咗鹿兒島嘅A5福永和牛個湯牛味好鬼濃，同樣係用低溫慢煮嚟炮製啲牛肉，食落可以話係入口即溶好鬼和味。