聞鹿鵜舞

又到同朋友飲酒食飯嘅好日子!呢次去食鵜舞食鹿兒島期間限定料理,同朋友試吓新菜式一齊飲返兩杯爽吓。 門面好有味道真係好似去咗日本咁!餐廳裡裡外外氣氛都好正仲要價錢唔貴,所以我同老婆大人成日都會約朋友嚟食飯。 呢一餐由健康嘅茶美豚肉金柑沙律出發!肉味香濃嘅茶美豚肉食落幾軟滑唔會鞋口,加埋啲好香嘅金柑呢個沙律勁爽口開胃。 然後嚟一份我最鍾意嘅油甘魚刺身!厚切嘅油甘魚好紅潤好有光澤,食落去魚油好香而且味道真係好鬼鮮甜正喎。 有刺身唔爭在食埋壽司叫咗呢個爽口嘅鯛王壽司!肉質細緻軟嫩嘅鯛王味道淡雅得嚟好鮮嫩,鍾意溫柔嘅刺身朋友要試呢個。 食完刺身壽司開始食啲熱嘢整個泥烏賊天婦羅嘆吓先!墨魚食落去好煙韌彈牙仲幾鮮味添,用嚟做天婦羅口感味道都幾出色。 跟住見有呢個甜薯天婦羅梗係要嗌俾老婆大人食啦!又粉又淋嘅香甜番薯要嚟做天婦羅好啱Key喎。 跟住呢一個茶美豚鍋味道都好唔錯!入面除咗有肉味香濃嘅茶美豚之外仲有滑捋捋嘅豆腐,跟住仲有大白菜同埋冬菇浸喺個清甜嘅湯底入面,食落真係好舒服好好味感覺仲好健康添。 呢個係鹿兒島茶美豚五花腩脆米紫菜卷,紫菜我食唔到不過可以食豚肉五花腩,加咗個特製醬汁味道又另有一番境界幾特別㗎。 牛魔王嘅我梗係要叫埋呢個鹿兒島半生熟和牛肋眼嘆吓啦!熟度啱啱好嘅牛肋眼食落去好腍滑牛味都好唔錯,鍾意食和牛嘅朋友可以叫佢嚟試吓。 最後嘅甜品我哋叫咗呢個亮晶晶嘅水信玄餅!食落去好爽滑嘅水信玄餅配咗香甜嘅黑糖同埋黃豆粉真係好夾,不過食嘅時候小心唔好俾啲黃豆粉濁親呀哈哈。

地址
鵜舞
香港荔枝角長義街9號D2 Place ONEShop G02, G/F
評分
5/5
gd
下一篇載入中