健康素食料理 —— MUM 日常野菜料理

成日都覺得新蒲崗好隔涉，但竟然有好多好嘢食！今次中午嘅時候就去咗MUM日常野菜料理食lunch。可能因為星期六，啲人仲未起身🤭 所以一入去嗰陣得一枱客。不過食到三分一嘅時候，陸陸續續都有客人入嚟，仲好快就full house！可想而知依間餐廳都幾受歡迎😮 餐廳室內設計以水泥工業風同埋木系為主，環境有少少昏暗，但感覺温暖。餐廳主要售賣日式定食，有十幾樣菜式可以選擇，以三項／四項為一個定食套餐。 【日常定食（四項）】｜$129｜👍🏻 每個定食都會包括一碗味噌湯、一杯麥茶、一碗飯／加錢轉烏冬。因為第一次食想試多啲，所以揀咗四樣菜式，分別有：蓮藕五目煑、本菇茶杯蒸、南瓜薯餅、野菜天婦羅。落完單之後，五分鐘都冇就已經有得食😶 仲要樣樣都熱辣辣！ 〖正氣黃薑飯〗 飯有兩款，五穀雜炊飯 或 正氣黃薑飯。我就揀咗正氣黃薑飯，一食落去，咁硬嘅？同埋凍冰冰。唔知係本身黃薑飯應該係咁定真係間餐廳擺耐咗，所以又硬又凍，同埋其他餸一齊食好奇怪，又凍又熱咁，個人嚟講鍾意食熱嘅飯多啲，有啲失望。 〖味噌湯〗｜👍🏻 好足料嘅味噌湯！清甜、好飲！😋 〖蓮藕五目煑〗｜👍🏻 用咗五種醬料整嘅蓮藕，係咪真係有五種就食唔出😂 但我覺得係好食嘅，甜甜地、日式醬汁嘅味道。 〖本菇茶杯蒸〗｜👍🏻 好滑、好滑、好滑嘅蛋🥰 一食落口就即刻滑到去喉嚨，夾埋本菇一齊食就有兩種口感。不過個人覺得個日式醬油加得有啲多，有少少畫蛇添足，食落偏重豉油味。 〖南瓜薯餅〗｜👍🏻 表面有海苔鹽同埋蛋黃醬，食落香脆、creamy，好食！ 〖野菜天婦羅〗｜👍🏻 表面都係有海苔鹽，炸粉唔會好厚、好油膩，仲會食到蔬菜嘅原味！攤凍咗一陣都一樣好食！ 總結：令我幾impressed嘅一餐，揀嗰四樣菜都好出色，當中可能有少少美中不足，同埋個飯扣咗啲分，但整體都算係中上嘅一餐！👏🏻 #熱門菜式#食咗先講#打卡美食挑戰#香港美食#打卡#美食#打卡美食#新蒲崗美食#相機食先#日本料理  MUM 日常野菜料理 📍 新蒲崗仁愛街34號地下B號舖 位置／環境： 7.5 / 10 食物質素： 9 / 10 性價比：8.5 / 10 服務：8.5 / 10 會再去嗎？： YES