【Mano（銅鑼灣）】｜折扣後抵食又好味

屋企人食飯，家姐搵到呢間較早嘅晚餐時段有半價 /七折優惠，雖然有限時90分鐘，同埋有折扣時段係比正常晚餐時間早少少，但屋企人一向都係早食飯，所以照訂位。 去到餐廳時剛開門冇耐，跟住好快已經差唔多坐滿晒！佢係A la Carte menu 有折，套餐冇折，不過我哋本身都冇諗住食套餐，所以冇所謂，以下價錢全部係原價。 🍴Burrata Salad（$168） Butrata cheese 係意大利牛奶芝士，外面固體嘅係 mozzarella，入面係Stracciatella di bufala，切開時入面非常軟身，係相對比較清淡嘅芝士，配車厘茄、火箭菜沙律，下面有蜜桃，醬汁係red pesto，可能因為有 peach 嘅關係，醬汁微酸中帶甜，係好味嘅開胃菜！ 🍴Steak Tagliata（$308） 呢款侍應講明只會做5成熟，冇得揀熟度，我相信廚師係有佢堅持嘅原因。呢個意大利牛柳係 8oz，Tagliata嘅意思係切片牛柳，有5片。開頭見到時，覺得係咪生咗少少呢？望落去似介乎3成至5成熟之間，切開食，原來真係啱啱好，肉質非常軟，有肉味，煮得再熟D 個口感同味道就會完全改變，呢個真心要讚廚師！Mushroom sauce 都做得好好，配上 sun-dried tomatoes 同火箭菜，好味！ 🍴Italian Braised Short Ribs Tagliatelle（$258） 嚟到嘅時候都幾驚訝，牛小排都幾大件，好易離骨，肉質非常軟腍又入味，每啖都有肉汁，近骨嘅地方有筋膜位，感覺到滿口骨膠原。番茄扁意大利麵醬汁好味，意粉煮到 al dente 有咬口，唔錯！ 🍴Vongole Risotto（$228） Presentation 幾精緻，上面排咗6隻白酒煮蜆，蜆肉都頗新鮮，幾鮮甜，Risotto 用咗墨汁煮，個汁幾好味，我本身係鍾意食有咬口嘅意大利飯，可惜嘅係，個飯有1/3 飯粒煮唔熟，口感好唔一致，呢個係暫時咁多款食物入面比較唔好食嘅～ 🍴Parmesan Fries（$68） 呢個薯條係驚喜咁好食，成份薯條表面鋪滿晒好幼細嘅 Parmesan Cheese，完全冇留手！因為即刻炸完仲係好熱，薯條外面炸到好香脆，入面好軟，加埋帶鹹香嘅芝士碎，真係好食到不得了～ 呢度嘅環境okay，open kitchen，因為樓上店樓底矮，所以坐滿客人時聲音會好集中。侍應服務態度非常好，解釋得好清楚，亦都好留意到客人嘅水杯狀況，適時斟水。如果唔介意食早飯，5:30pm booking 係半價，6pm booking 係7折，計落都幾抵食，折扣後性價比幾高！ 體驗感受 ⭐️⭐️⭐️⭐️ 🔍Mano（銅鑼灣），香港 追蹤我的IG：tracyloveliving  #銅鑼灣 #銅鑼灣美食 #抵食 #折扣優惠 #樓上西餐 (此文章由U Blog 同步發佈至社群)