Mschichi-鬧市中一條龍打邊爐

Mschichi-鬧市中一條龍打邊爐 家嫂一家大小 地址: 尖沙咀堪富利士道8號格蘭中心3樓 電話: 28778018 之前喺柴灣都食過佢間家嫂打邊爐， 好唔錯！ 👍🏻 今次適逢屋企人生日， 就嚟到尖沙咀呢間交通方便啲嘅舖試吓啦 我哋食五點至七點嘅優惠時段。每位348 +1可以七點前離座， 時間就比較趕急， 不過屋企人都食得唔多， 所以早啲食， 早啲俾個胃休息吓先瞓覺都係一個好選擇😆🤭 飲品方面就同柴灣差唔多， 竹蔗茅根水， 洛神花茶， 菊花茶同埋一啲水果茶嘅選擇。 飲落都唔加甜， 打邊爐有潤喉野飲值得一讚 👍🏻👍🏻 首先佢會推出一隻好大嘅刺身船俾你打卡用嘅😆😆❤️ 刺身就是日精選， 我當日都有七款刺身。 味道就係自助餐級數啦， 都唔可以要求太高。 前菜就有幾款， 分別有皮蛋， 螺頭， 中式蚊雞師， 炸蝦多士， 台式糍粑等等。 小食係可以任叫嘅， 質素就中規中矩， 最鍾意食係蝦多士螺頭同埋糍粑比較特別啲 🥰屋企人就讚個皮蛋晶凝通透佢哋話係靚嘅皮蛋。 之後就可以食雞煲， 我哋揀咗唔辣嘅雞煲雞， 切件細細容易進食， 不過就冇咗啖啖肉嘅口感 🥺 我哋1家5 口食一隻雞都已經夠晒數， 之後就可以轉去打邊爐啦😍 打邊爐佢係冇點餐紙既， 總之佢會上第一輪有海鮮丸類菜類公仔麵炸魚皮等等。如果你想食呢， 就可以叫侍應再上。 佢就會按返廚房嘅供應情況再幫你落海鮮， 有時都未必有返你想食嘅海鮮。 有少少特別嘅海鮮， 例如鮑魚， 佢就會定時去枱邊問你要唔要。 我哋今日嘅海鮮都有蟶子、 大蜆、兩條甩皮魚、鮑魚、海蝦。 新鮮程度都滿意， 當然自助餐級數， 好鮮味又夠飽， 其實食完呢啲所有第一輪嘅嘢食之後， 我哋都飽得7788， 再叫多兩輪鮑魚蟶子同埋海蝦就已經夠晒數😆😆🤭 佢出邊仲有啲雪條同埋雪糕， 但係就吸引程度唔高。 整體來講我哋覺得第一次喺柴灣分店係高質啲， 同埋柴灣以差唔多價錢來講， 佢係唔限時嘅！！ 上次我同老公兩個人食都慢慢食咗三個鐘， 又好開心， 同埋柴灣因為佢唔限黃金時段， 仲有埋紅白酒巡迴俾你飲！ 同埋有啲貴價小小嘅海鮮， 例如珊瑚蚌都係稍後時段先會出場嘅。所以如果鍾意慢慢食， 又食得多嘅朋友， 我就會覺得去柴灣分店比較好❤️❤️ 但係尖沙咀分店地點方便都可以一試既 #我想參加工作坊