【大埔區】【WM Café & Bar】又嚟到大埔區，咁樣輪吓輪吓，有啲區又唔多寫嘅情況之下，又好似好快到大埔區咁。我相信呢啲嘢都係講感覺，我日日搏命係咁寫就梗係覺得好似過得好快咁，但如果係齋等某啲區份嘅讀者，就可能會好似等極都等唔到咁。 「曾笑過怨過未願分 愛過痛過亦願等 甘心長夜獨對晚星……」 - 張美賢 （彭羚《愛過痛過亦願等》） 之前同大家講過大埔昌運嘅咪走雞餐廳，亦因此爭取到同女同事嘅一次對話。我當然並未興奮到不要不要咁，但係喺心入面都掀起咗一定程度嘅波瀾。今次就去到咪走雞對面一間西餐廳，見佢哋都幾有港式風味，梗要食吓。 見到啲晚餐，我諗住點都揀到一個，點知諗嚟諗去都好似唔係好啱食咁，最後都係揀返最無諗法嘅鋸扒。餐湯係「忌廉龍蝦湯」，都幾細碗，而佢鮮味好重，但重得嚟好似有啲假。不過都好過個餐包，好似叮到過咗龍咁。 都諗住今次出事喇，我個主食係「燒澳洲安格斯肉眼扒250g配雜菜」，我仲要揀三成熟，係信任嘅表現。等咗都好一陣，先見佢上菜，出到嚟又好似靚靚仔仔咁。趁未太熟快手啲食，估佢唔到吖又整得幾好食，牛味又夠。 最重要嘅係佢整到三成熟嘅外層微焦裡面唔熟嘅狀態，真係估佢唔到。搞到啲薯茸同雜菜都喺心情唔錯嘅情形食晒。加 $12 飲「凍朱古力」，唔差嘅，夾埋成餐 $297，抵就一定唔係抵架喇，不過畀到一剎那嘅驚喜我架喇。。。 （地址：大埔安慈路2號八號花園地下20號舖） #1amfoodie #foodie #hkfoodie #thatfoodiething #hkfood #food #instafood #yummy #foodlover #delicious #foodies #tasty #globaleats #tastyfood #lunch #dinner #foodpics #followforfollowback #love #eat #1am大埔區 #大埔 #wmcafebar #WMCafé&Bar #忌廉龍蝦湯 #燒澳洲安格斯肉眼扒 #雜菜 #三成熟 #凍朱古力 #1am0911 #1ambackup