金文拔芝士夾心餅

我入去Donki本來係想買餸嘅，但係佢冇我想要嘅蔬菜，啲牛蒡淨返兩包奀chichi，想買紫蘇葉又一包都冇，係太受歡迎啲人買晒？定係大家唔鍾意食，滯銷所以舖頭決定唔上架呢？我寧願係前者，咁下次都有機會買嘛。 最後買咗啲香腸，買咗啲紀文嗰啲丸，同牛角紫菜飯素就走人，喺就行到去cashier嘅位置，見到有啲產品做大清貨，Petit啲零食而家包裝改咗，短咗，份量畀以前少咗大概兩三成，我冇買好耐，但今日呢個芝士餅兩蚊咋，食得切唔係唔買呀嘛？ 話時話以前佢同一個系列有一隻綠色包裝嘅夾心餅，都係芝士餅，不過唔係呢種餅乾，係似迷你Ritz同夾住嘅係車打芝士，嗰隻仲好食，今日買呢隻唔係唔好，但我覺得冇咁香囉，但兩蚊咋，我真係唔敢太demanding囉。