📍旺角｜生猛海鮮鐵板燒🔥鮑魚的最後掙扎

最近花園街新開一間鐵板燒店連手搖飲品店， 入內都尚算光猛，有三張大鐵板燒檯可以俾客人就座用餐，近距離欣賞廚師喺你面前烹調鐵板燒。 皇牌套餐包括🥗前菜、沙律、時蔬、麵豉湯同飯，仲有南非鮑魚、大蝦、帶子/三文魚/魷魚(任揀一款)同一款自選牛。👧🏽就揀咗帶子同美國牛肉薄燒，而食肉獸👦🏻就揀咗貴啲嘅澳洲和牛厚燒 兩隻南非鮑魚仲喺度蠕動緊😳真係極！度！新！鮮！👧🏽影完靚相打完卡之後，廚師就準備烹調。廚師將蝦頭取出放到鐵板邊緣慢煎，隨後侍應就上咗開胃前菜漬物同沙律俾客人 廚師首先煮🌶️紅椒、翠肉瓜、粟米芯，十分清甜，蘑菇亦都唔會煮得太乾。同時間廚師亦將大大隻南非鮑魚上鐵板，純熟去殼再烹煮🦪新鮮嘅鮑魚遇熱不斷蠕動同收縮，視覺十分震撼，最後加上少許鹽同胡椒調味就變咗我哋嘅桌上佳餚了。廚師烹煮鮑魚嘅時間掌控得唔錯，唔會過熟，十分彈牙同鮮味🤤 跟住落鑊嘅係原隻帶子同魷魚，簡單用🧈牛油、鹽同胡椒調味煎煮，已經十分香口。而較早嘅煎🦐蝦頭有濃濃嘅蝦膏，膽固醇爆標不二之選。大蝦就用上秘製醬汁汁煮，除咗同帶子魷魚一樣彈牙以外，仲多咗份濃濃鹹香😛不過以上嘅海鮮喺視覺上嘅享受就較鮑魚遜色了 到食肉獸👦🏻最鍾意嘅牛牛Time了。大大片美國牛肉薄燒，除咗品嚐到本身牛香，中間加上香蔥同蒜片🧄，增加口感之外，亦減低咗油膩感。而厚燒嘅澳洲和牛，廚師會問客人想要嘅熟度，Order咗生少少，出嚟嘅效果十分Juicy💦，牛味亦濃郁，厚厚肉嘅口感相比起薄燒牛更為滿足 食完肉，抖一抖，廚師就準備另一輪主食了。侍應奉上一小碟漬物同麵豉湯🍲打開麵豉湯碗蓋，香味隨即溢出，加上嫩滑嘅豆腐同爽脆嘅昆布，令👦🏻覺得驚艷。而廚師炒出大大碗嘅炒飯，用上牛肉、香蔥同配菜炒成，就算係男士亦都一定夠飽 套餐就可以半價加配飲品 👧🏽 揀咗檸檬寒天清茶，寒天有咬口，茶底配埋檸檬，微酸而不會過甜，味道不俗。而 👦🏻 就有點後悔揀咗喳咋瀑布，原因係因為好好味太足料！好似飲咗一大碗糖水落肚🧋，加埋呢餐鐵板燒，飽到有啲飽上心口。 最後再點一份甜品多士🍞廚師用鐵剷將溶咗嘅牛油淋上方包，再加上砂糖反轉再煎❤️吸收咗牛油同砂糖嘅方包轉眼變香脆甜多士，滿足👧🏽嘅甜品胃，👦🏻亦正式飽到投降。 王牌套餐最平$368就可以食到海鮮同牛，加上廚師即席喺面前烹調嘅場面，呢一餐嘅性價比不俗，適合鍾意嚐鮮打卡嘅朋友仔一試✨