和牛燒肉一郎 2023/11/30

【和牛燒肉一郎(將軍澳)】|列車送上高質和牛

我個人好鍾意食燒肉,尤其係高質素嘅牛肉,今次揀咗呢間網上面評價唔錯嘅和牛燒肉放題,睇吓掂唔掂先~ 我同朋友揀咗放題D($478/120分鐘),4款和牛有牛肉眼、牛肋肉、牛里脊肉同埋牛柳粒,當中嘅牛肋肉同牛里脊肉係可以無限添加! 所有和牛輕輕燒吓加埋玫瑰岩鹽就食得,當然佢仲有多款醬汁可以加落去食。每款和牛都油花均勻,好易咬開,肉味濃,肉嘅質素非常好。另外仲有一大塊和牛西冷,店員會幫你燒,可以揀5成或8成熟~ 同時都有美國同澳洲嘅特選牛肉可以揀,都係好高質!如果不斷凈食牛肉覺得油膩,可以叫生菜,發揮創意用生菜包住燒肉同其他配料一齊食,我自己就落咗醬汁、燒菇同紫菜條食,你亦都可以叫泡菜盛盒(白菜、青瓜、白蘿蔔泡菜)包落去,可以減輕單純食肉嘅油膩感。最後,牛肉方面,唔可以錯過嘅係熟成壺漬牛肋肉,呢個壺漬嘅醬汁真係不得了,味道正之餘仲令到牛肋肉更鬆軟,非常好食!將D 菇類先浸呢個汁再燒會更加滋味㗎! 除咗瘋狂食牛肉外,佢嘅海鮮都好正,尤其推介蒜蓉牛油海蝦,海蝦已經開邊,中間夾住蒜蓉牛油同蔥,蝦肉新鮮爽口,好味!味醂魚乾燒嘅過程好得意,佢會脹大又縮返,呢個送酒一流!因為太鍾意食牛肉,都未有空間試到豚肉同雞肉呢~ D餐有包梅酒、清酒、啤酒任飲,自助區有好多款罐裝飲品、汽水、8款花茶同3款茶包、咖啡任揀,點都會揀到啱飲嘅嘢!另外仲有白飯、和牛肉燥、紫菜湯、沙律菜同配料、甜品、雪糕雪條、爆谷,選擇多到眼花繚亂~ 最得意嘅係牛牛造型棉花糖,估唔到BBQ 必食甜品嚟食燒肉放題都食到!可惜嘅係,咁啱個棉花糖機維修中,我本身好想試玩吓呢~ 除咗自助區食品飲品外,係用QR code 落單,方便又環保,食物用燒肉幹線列車送到,又快又唔漏單。 環境坐得舒服,抽風做得唔錯,食完都唔會一身燒肉味出返嚟,店有提供圍裙,著淺色衫都唔怕整污糟!自助食物區好整潔,令人食得好放心,職員服務態度好好,不時會教我哋點樣燒會最好食,亦都有時會幫我哋燒,中間主動幫我哋換咗2次燒網,收碟收得好快唔積聚,連唔係侍應嘅收碟姐姐都非常好禮貌。呢間燒肉放題高質又好味,食得好開心! 體驗感受 ⭐️⭐️⭐️⭐️⭐️ 🔍和牛燒肉一郎(將軍澳) ,香港 追蹤我的IG:tracyloveliving  #自助餐 #日式放題 #日式燒肉 #日式燒肉放題 #將軍澳美食 #和牛日式放題 (此文章由U Blog 同步發佈至社群)

平均消費
HK$500
地址
和牛燒肉一郎
香港將軍澳貿業路8號新都城中心2期1樓1040-41號舖
評分
5/5