尖沙咀日本過江龍拉麵店 限定鯛魚湯拉麵

尖沙咀本身有琳瑯滿目嘅拉麵店，今次試依間比較冇乜人知嘅日本過江龍嘅拉麵店 —— 一郎🍜 成間舖以Bearbrick做主題，走一個偏向卡通嘅風格。因為自己一個去食，店員安排咗bar枱嘅位置俾我，相比起卡位，bar枱就冇咁闊落，bar枱最入嘅位置仲會同前面張卡位頂住咗，明白希望想盡量要多啲座位所以咁設計，但顧客嘅體驗就唔係咁好😕 【限定君 —— 鯛魚湯拉麵】｜$138｜👍🏻 今次試咗期間限定嘅拉麵，都幾有驚喜！湯底呈奶白色，飲落鮮甜，帶啲鯛魚味。麵底係幼身嘅拉麵，我揀咗「普通」嘅硬度，一開始食都覺得幾彈牙，食到中段嘅時候啲麵已經俾啲湯浸淋咗，冇咗一開始食嗰陣嘅口感，下次我可能會揀翻「硬」嘅硬度！除此之外，碗拉麵都有幾多配料，包括：鯛魚、叉燒、溫泉蛋、竹荀、青豆、豆腐泡、紫菜。最估唔到嘅係除咗鯛魚之外，仲會俾埋塊叉燒！鯛魚一共有三塊，全部都好嫩滑！叉燒就有一塊，不過不失，因為係慢煮，所以都唔會好柴。溫泉蛋煮得都啱啱好，濃郁！意外地竹荀嘅份量都唔少，竹荀愛好者就啱晒喇😋 【溫泉蛋冷豆腐】｜$38（追加小食） 第一次見依款小食，所以就嗌咗嚟試下，溫泉蛋釀咗喺豆腐入面，一切開啲蛋液流晒出嚟🤤豆腐上面有啲木魚碎，底下係柚子汁，夾埋一齊食好清新同埋有唔同嘅口感👍🏻 總結：個人唔鍾意太濃味／油膩嘅湯底，所以依個湯底好啱我😋成個拉麵各方面都做得幾好，下次有機會可以試下其他湯底同埋小食！☺️ p.s. 依家凡惠顧拉麵一碗，另加 $19.9，即可享有60分鐘日式煎餃子放題🥟 鍾意食日式煎餃子／大胃王記得唔好錯過喇！😋 #熱門菜式#食咗先講#打卡美食挑戰#香港美食#打卡#美食#打卡美食#尖沙咀美食#相機食先#日本料理#著數報料 一郎 📍尖沙咀漢口道19-21號漢宜大廈地下L號舖 位置／環境： 8 / 10 食物質素： 8.5 / 10 性價比：8.5 / 10 服務：8 / 10 會再去嗎？： YES