無敵煙花靚景晚餐

呢間餐廳喺酒店嘅41樓入面仲有三面嘅落地大玻璃,可以睇到維港兩岸嘅景致之外,仲會有好精緻嘅歐陸菜式嘆,喺呢度食晚餐睇日落好正睇煙花就更加壯觀。 另外酒店嘅頂層原來有個海天閣,可以一覽無遺咁望晒香港好靚嘅景色,酒店仲好正咁喺國慶煙花嗰一日,比所有住客同埋餐廳嘅食客上嚟欣賞煙花,你話仲使乜鬼嘢去維港兩岸同人哋迫吖。 麵包籃入面有三款麵包都好好食,最正嘅係配左橄欖油、牛油同埋香草醬,鍾意邊樣就搽邊樣嚟食好爽皮。 我揀咗Half Pairing $180就有三杯配酒,Gosset, Excellence, Brut,明亮清澈嘅細膩汽泡仲有陣陣嘅白桃、梨子、橙花同埋青檸檬的香味,酸度均衡飲落去充滿新鮮感。 香辣澳洲頂級純種和牛韃靼味道鮮香口感仲好香滑,大廚仲配咗魚子、巴馬臣芝士蛋糕、柑橘醬同埋辣根酸忌廉,夾埋一齊食味道好鬼正斗。 意大利煙油甘魚香草蒜油烤藜麥意大利雪糕,油甘魚配咗個蒜油食落好香口,不過最特別嘅係個烤雪糕,冷與熱情之間令呢個菜吸引咗好多。 椰菜花松露酸忌廉湯味道好濃郁,入面仲有淡淡嘅黑松露香味,老婆大人就最鍾意佢用酸忌廉嚟配個湯,令到成碗湯都冇咁漏我都覺得好鬼好味。 中場休息整返杯伏特加檸檬雪葩,清一清個口又可以繼續再食好嘢。 Palliser Estate, Dry Riesling, Martinborough, New Zealand 2020,酒身清澈明亮帶淡淡嘅檸檬黃色,散發出鮮榨酸橙、青蘋果同埋白花嘅味道,入口幾清爽仲有礦物質味嘅餘韻用嚟配海鮮就啱晒。 香煎北海道帶子入面仲有啲意大利乾魚子同埋芹菜頭蓉,仲配個乾蔥同埋薑汁泡沫味道幾有新鮮感㗎。 土耳其鱸魚蝦肉卷,用咗鱸魚肉包住啲新鮮嘅蝦肉,然後加多隻煙燻青口同埋薯蓉,最正嘅係大廚竟然配咗個好中式嘅萵筍汁,令到呢味菜好味之外仲食得好有趣。 Alamos, Selección Malbec, Mendoza, Argentina 2019,口感好乾爽而且帶有濃濃嘅果香果係我鍾意嘅紅酒味道。 美國SRF和牛牛腩扒配薯仔千層、蔬菜及牛肉燒汁,牛扒肉質好嫩滑肉味都好香濃如果可以多一件就更加開心哈哈!另外配菜嘅薯仔千層加咗黑魚子真係好食到停唔到口。 焦糖千層蛋糕甘香嘅焦糖味加埋好鬆化嘅脆餅,就算唔係好鍾意食甜品嘅我都隊晒。

地址
Le 188° 餐廳及酒廊
41/F, Harbour Grand Hong Kong, 23 Oil St, North Point, 香港
評分
4/5
下一篇載入中