牧羊少年全新概念店 —— 集合餐廳、酒吧、舞台、於一身

牧羊少年咖啡館嘅分店遍佈港九新界，包括銅鑼灣、旺角、沙田等等。不過全部我一次都未去過🤣 今次第一次去就係位於尖沙咀文化中心嘅全新概念店 —— 牧羊少年與他的浮萍。 牧羊少年與他的浮萍分開兩個區域，一邊係餐廳／展覽區、一邊係酒吧／舞台。餐廳好大，除咗一望入去嘅座位之外，行到入面仲有好多座位，空間感十足！ 【烤10安士澳洲M4安格斯西冷 配燒新薯 及烤美國露荀】｜$288 西冷嘅外層少少焦香、內層口感軟腍，嗌咗5成熟，煎得剛剛好。唯獨美中不足嘅係咁啱揀中咗個筋位，有四分之一嘅肉都比較難噍😕 配菜方面，薯仔同露荀都幾好食。整體不過不失👍🏻 【青醬雞肉露荀貓耳朵粉】｜$138｜👍🏻 平時出面好少有貓耳朵粉食，今次見到有就嗌咗。本身以為好普通，但比起之前食過嘅貓耳朵粉，依個更有咬口、煙韌！配搭埋青醬、雞肉、芝士一齊食都幾夾👍🏻 【芝士四重奏薄餅】｜$198｜👎🏻 同想像中好大出入🥲 餅底好硬、乾，除咗鹹味之外食唔到有其他味，同喺超市買塊急凍Pizza翻去自己加熱個味道好似冇咩分別......依個價錢喺其他地方應該可以食到更高質素嘅Pizza。 【牛奶咖啡 Latte】｜$44｜👍🏻 用咗Holistic嘅咖啡豆，LUCKY DUCK Blend：Ethiopia, Brazil & Colombia，一杯好classic nutty flavour嘅latte，espresso同奶泡融合得好好，順滑，仲有咁靚嘅拉花，比個讚好咖啡師👍🏻 【手沖咖啡 Hand Drip】｜$88 揀咗Knockbox嘅Ethiopia, Yirgacheffe, Misty Valley, Idido G1, Natural，唔太啱我口味，風味集中，有啲過分萃取，沖煮Recipe上需要調整一下。 總結：無可否認係一間環境幾好嘅餐廳，但係食物質素就有啲參差，要揀啱嘢食先OK，個人嚟講整體係有啲overpriced。如果係想揾間就腳、坐得舒服，同朋友傾下偈嘅餐廳嘅話，都可以一試的。 #熱門菜式#食咗先講#打卡美食挑戰#香港美食#打卡#美食#咖啡#食好西#相機食先#西餐#尖沙咀美食 牧羊少年與他的浮萍 📍尖沙咀梳士巴利道10號香港文化中心地下 位置／環境： 8.5 / 10 食物質素： 7.5 / 10 性價比：7 / 10 服務：8 / 10 會再去嗎？： MAYBE