元祖級韓國餐廳 — 李家

李家都算係香港嘅元組級韓國餐廳，周不時都會喺網上見到人介紹。餐廳不但由韓國人主理，連店員都係韓國人。 今次去嘅時候係平日嘅10點左右，唔算好多人，但都有幾枱客，枱同座位都算闊落，枱與枱之間都有適合嘅距離。 【韓式玫瑰炒年糕】｜$188｜👍🏻推介 有驚喜嘅炒年糕！平時食炒年糕都係長條狀/圓片狀，今次依款炒年糕真係第一次見！有啲似幼身少少嘅烏冬，口感介乎烏冬同平時食開嘅年糕之間，煙煙韌韌，非常特別！雖然價錢比一般炒年糕貴，但除咗炒年糕之外，入面都有魚糕同埋唔同類型嘅蔬菜，仲有腸仔！醬汁調味都恰到好處，食到後段都唔會覺得好膩！ 【青辣椒蛋黃醬炸雞跟洋蔥】 Half (boneless)｜$123｜👍🏻推介 雖然有一大堆蛋黃醬喺炸雞嘅上面，但炸雞都係依然保持香脆同埋Juicy！蛋黃醬唔會過濃，反而有種清新嘅感覺，有少少驚喜！除此之外，佢仲跟好多洋蔥！本身唔太食生洋蔥嘅我，夾埋蛋黃醬同炸雞一齊食都覺得OK！有助減低一般人食炸雞嘅時候好驚嘅油膩感！ 【芝士雞蛋卷】$128｜👍🏻推介 一開始見到個價錢有啲驚訝，但一上碟嘅時候仲驚訝🫢 分量比平時喺出面食嘅芝士雞蛋卷大好多，所以都算對得住個價錢！茄汁、芝士、雞蛋加埋一齊基本上係冇得輸嘅組合，雖然今次煮得有少少過熟，但整體嚟講都好食！ 【蜂蜜蒜蓉炸雞】Half (boneless)｜$109 好甜好甜同好甜☹️ 一入口淨係食到好甜嘅蜂蜜味，其他味咩都食唔到，啲蜂蜜包裹住成舊炸雞，但都食到少少香脆嘅口感。依款炸雞對於我嚟講略嫌有啲過甜😿 不過有兩位朋友反而幾鍾意。如果平時唔鍾意食甜嘢啲人就唔推薦嗌依款炸雞喇～不過如果係本身鍾意食甜嘢嘅朋友都可以一試！ 總結：適合一班人聚會嘅餐廳，嘢食夠大份同埋環境夠闊落！依家普遍餐廳都收好早，但依間韓國餐廳就開到凌晨6點！出街玩到好夜／放工收好晏／住附近嘅朋友想食宵夜，李家都係一個唔錯嘅選擇！ #熱門菜式#食咗先講#香港美食#打卡美食挑戰#尖沙咀美食 李家 📍尖沙咀山林道54-56號利雅商業大廈地下2號舖 位置／環境： 7.5 / 10 食物質素： 7.8 / 10 性價比：7.5 / 10 服務：7.5 / 10 會再去嗎？： YES