同朋友慶生當然要食得精緻d，精挑細選下揀咗呢間位於尖沙咀嘅omakase，其中一個原因就係晚市時段提供嘅兩種價位omakase，都做緊限時優惠價。 「花」 $1280 (原價$1680) 呢款價位較平嘅omakase一共有16品料理，包括咗前菜、刺身、季節料理、壽司、吸物同甜品，已經非常之豐富。 前菜嘅蟹肉寒天，鋪上北海道馬糞海膽、蟹子同金箔，見到賣相已經流哂口水。個寒天清爽得黎食到超鮮甜蟹肉味，加上creamy濃郁嘅海膽，為呢一餐打開完美序幕。 跟住就上刺身，鱈魚白子口感綿密細緻，配以酸汁同埋辣蘿蔔蓉，味道層次豐富。竹籤魚輕輕火炙過，肉質軟嫩，充滿油香，面頭搽咗少少麵豉醬，食落甜甜哋，非常特別。 再黎係鮟鱇魚肝最中餅，脆身嘅最中餅，夾住細滑綿密嘅鮟鱇魚肝、幼滑細膩嘅海膽、蟹子、金箔一齊食，入口魚肝同海膽甘香醇厚嘅味道交織埋一齊，齒頰留香。 接住落黎有茶碗蒸清一清個味蕾，茶碗蒸口感順滑，入面有蟹肉、香菇、鳴門卷等配料。 再黎就係壽司，師傅用上時令新鮮嘅食材即席炮製手握壽司，款款都係咁鮮甜味美，今日就食到以下幾款： -左口魚壽司：魚肉擁有爽嫩口感，味道鮮甜 -毛蟹壽司：原條毛蟹肉，啖啖肉之餘十分之鮮味 -深海池魚壽司：肉質偏爽，充滿油香 -赤貝壽司：口感好爽彈，而且好鮮甜 -北寄貝壽司：輕輕火炙過，帶少少焦香 -沙甸魚壽司：加入咗蔥花去辟走沙甸魚原有嘅腥味，亦做到提鮮效果 -拖羅壽司：迷人嘅粉紅色，油脂分佈平均，入口軟嫩，油香四溢 -海鰻壽司：海鰻燒得好香身，個醬汁都唔錯 -海膽壽司：大大件海膽入口即融，細滑creamy -吞拿魚小卷：赤身魚味香濃，而且有3件夠晒飽肚 。 。 鮨盛 (尖沙咀) 尖沙咀廣東道122-126號中港中心11樓 。 。