蠔油肉片炒麵（脆麵底）

👨‍🍳 烹飪難易度（1為較易 - 5為較難）： 2 ⏱️ 烹飪時間： 20分鐘 ⏱️ 準備時間： 30分鐘 🥘 材料： 豬梅片200克、洋蔥半個、青尖椒2隻、麵餅三個、蠔油二至三湯匙、老抽3/4湯匙、水25ml、雞粉及糖各一茶匙、生粉水少許 醃料：糖、紹酒、生抽、生粉各1茶匙、麻油胡椒粉各少許 1️⃣ 製作步驟： （1）豬梅片如果好大塊就切到你想要嘅size，放入碗中，加入醃料拌勻醃半小時。（2）青椒及洋蔥切角。 （3）煲滾水，放入麵餅灼分半鐘至散開，夾起置於碟中代用。 （4）燒熱鑊，轉中火，落油，放入灼好嘅麵，整理成一個圓餅嘅形狀，煎兩三分鐘至微脆及呈金黃色，期間搖動鑊令佢受火均勻同唔好黐底，用鑊鏟輕輕刮起反轉用同一方法煎另一面，可加少許油以免太乾，煎好𢳂起上碟。 （5）鑊中落油，炒豬梅片至半熟，加入洋蔥少至開始變透明，灒水，落蠔油、老抽、糖、雞粉，落尖椒，兜勻，以生粉水埋獻。 （6）淋上麵面，禮成。開動。 🍽️ 烹飪貼士： （1）今次用嘅麵係P字頭超市自家品牌嘅瑤柱麵，可以選用其他品牌全蛋麵或者蝦子麵之類嘅乾麵，如果去粉麵舖買嗰啲比較大個嘅生麵就用兩個都夠 。如果想更脆口，做到好似潮州啲「兩面黃」咁嘅效果，需要做多個工序，吹乾啲個麵先至煎，用更多油做到似半煎炸咁，當然好好食啦，不過用好多油，同埋屋企嗰啲爐火係比較難掌握嘅。如果都唔鍾意同都怕用好多油，就唔好整脆面底，唔好做煎麵嘅步驟，淥開咗個麵，夾起，留待煮好啲汁料最後先落鑊快手兜勻。 （2）如果唔鍾意食豬梅片，你可以用牛柳絲，或者雞柳代替。