【葵青區】【新潮興粉麵餐廳】近排寫葵青都係青衣，今次過對岸寫吓葵芳。近排葵涌廣場好似因租金問題變到冇以前咁旺咁，不過從來呢個商場都好似不死咁，變極都係呢個樣。只係佢裡面間咗出嚟嗰啲細舖好似就真係十室九空咁，情況唔係好樂觀。 之但係今日唔係想同大家講葵廣，而係佢對面葵芳匯嘅一間餐廳。呢個商場新開，但都好似新咗十年八年，地舖有啲小食店，仲有間粉麵店。我去到呢間粉麵店嘅時候，佢都好似已經改咗一次名，之前好似係叫牛雜粉麵。 咁我入去就食碗 $70 嘅「牛坑腩牛雜粗麵」，點解咁鬼貴我相信係同我跟咗牛坑腩有關，碗麵一上無啦啦有隻三色貓走嚟同我爭食，勁好笑，佢勁為食，完全唔怕醜咁衝出嚟，店員就抱返佢入廚房。不過，碗嘢唔係話好特別。 佢啲坑腩唔算大塊，發揮唔晒啲肉香，而啲牛雜亦都好普通，難怪餐廳名都冇咗牛雜二字。飲品我飲「凍檸茶走甜」，都幾大杯，唔錯。之後叫碗 $48 嘅「淨紫菜四寶」，有墨魚丸、魚皮餃、香菇貢丸同豬肉丸每款各兩粒。 味道上，佢又唔算好特別，都係普普通通咁。要埋 $14 嘅「秘製鮮炸魚皮」，有另上一碗湯夠誠意，魚皮都炸得幾好，係滿意嘅。成餐夾埋 $132，不過不失，有貓有分加。另外佢叫潮州 Teochew 而非 Chiu Chow，又加分。。。 （地址：葵涌興芳路208號葵芳匯地下G05A號舖） #1amfoodie #foodie #hkfoodie #thatfoodiething #hkfood #food #instafood #yummy #foodlover #delicious #foodies #tasty #globaleats #tastyfood #dessert #foodpics #followforfollowback #love #eat #1am葵青區 #葵芳 #新潮興粉麵餐廳 #牛坑腩牛雜粗麵 #牛坑腩 #牛雜 #豬雜 #紫菜四寶 #墨魚丸 #魚皮餃 #香菇貢丸 #豬肉丸 #秘製鮮炸魚皮 #1am0912 #1ambackup