一個人都要食得招積

我經常一個人喺出面食飯坦白講都係揀啲茶記或者快餐店嚟食，質素講唔上好叫做填個飽肚就算！ 但係老婆大人就好唔鍾意我咁樣！佢話一個人食飯都要食得招積咁先至對得住自己，佢咁講又冇錯嘅做嘢咁辛苦食餐好啲都應該嘅。 呢日放假老婆大人就帶咗我去食呢間好過癮嘅烏冬專門店SOLO UDON，嚟呢度食嘢一個人都唔會覺得老尷㗎！因為佢啲座位一格格咁絕對唔會被騷擾到，最緊要係可以食到好味又有質素嘅嘢食吖嘛，有咗呢間正嘢之後我嘅晚餐就唔使咁頹廢啦。 嚟呢度食嘢真係可以完全唔使同人溝通！因為由買飛開始已經係全自助！呢度嘅嘢食會有日式烏冬、小食、飲品同埋甜品揀。 買完嘢食攞返張飛走去自己鍾意嘅位坐低，記住攞張飛嘟嘟側邊嘅QR code，咁樣店員先知我哋坐邊度㗎嘛。 跟住乖乖地坐喺度好快就會喺你前面嘅窿窿送上食物，真係好盞鬼不過勁想昅吓師傅個樣囉哈哈。 我同老婆大人每人點咗個午市套餐可以叫一碗自己鍾意嘅烏冬同埋一罐罐裝飲品，我哋兩個都唔想飲汽水就加多少少錢要咗枝炭陪烏龍茶，個烏龍茶真係幾好味喎原來係佢哋自家製嘅唔怪得知咁甘醇好味啦。 小食我哋嗌咗日本絹豆腐，呢個好滑嘅絹豆腐加咗啲炸蒜炸、炸洋蔥同埋芝麻辣油真係好鬼香口。 午市套餐可以加$38換一份小食我哋梗係唔蝕底！老婆大人就揀咗日式炸魚餅拼三重芝士春卷，個魚餅都幾彈牙但我就鍾意香口熱辣辣嘅芝士春卷多啲。 另一份加錢換購嘅小食係慢煮日本雞胸肉拼日本雞肉丸，個雞胸肉超級嫩滑好鬼正另外雞肉丸子估唔到都幾彈牙同埋好重肉味。 鍾意食蛋嘅我仲加多隻溫泉蛋呢度係用我最鍾意嘅日本蘭王蛋嚟㗎！要嚟就咁食或者放落烏冬度一齊食都得。 烏冬我就揀咗蝦濃湯吉列蝦烏龍麵，呢個蝦濃湯真係好足料好香蝦味，加上嗰個勁鬆脆嘅吉列大蝦同埋超級煙靭好味嘅烏冬我比滿分呀。 老婆大人鍾意食意粉所以佢一眼就昅中咗厚切煙肉天婦羅卡邦尼烏龍麵，我都偷偷地食咗一件厚切煙肉天婦羅外面口感勁鬆脆，入面係好有肉汁同濃郁煙熏香真係好鬼惹味，溝埋個卡邦尼醬汁食個烏冬真係好濃香滑又嘟嘟，不過佢加咗啲紫蘇葉又令到味道清新咗啲呢個配搭真係好正唔錯抵讚。 最後俾個甜品罐裝牛乳蛋糕引到我！成罐汽水咁樣嘅蛋糕我都係第一次食，嗌個烏龍麵加$38就食到一個平咗10蚊即刻覺得抵食咗！我哋叫咗士多啤梨同埋抹茶味兩隻都好唔錯喎，抹茶茶味好甘香士多啤梨就夠晒新鮮香甜正呀。