情人節快樂

今日係情人節我要返工冇辦法同老婆大人慶祝！所以一早就買咗禮物收埋喺屋企送個驚喜俾佢，至於食飯我梗係醒目提早同佢食咗先啦。 就係過年前去咗呢間壽喜燒伊勢熊食壽喜燒慶祝，係呀呢期我哋真係好鍾意食壽喜燒哈哈哈。 餐廳入面用咗好多竹做裝飾加埋日式嘅裝修係幾有日本feel嘅。 呢度位唔多總共得廿零個想食記得要訂位，識食梗係坐吧枱睇住師傅一邊整一路食最過癮啦。 如果鍾意密密斟嘅朋友咪揀卡位坐囉，包保冇人騷擾到你哋sweet sweet 。 坐底之後師傅為我哋介紹今日要食嘅肉！我呢個牛魔王梗係食A4壽喜燒套餐啦，今日仲要食到兩款唔同嘅牛肉包括係京都姬牛同埋香川橄欖牛，啲油花靚到呢真係見到都已經流口水。 老婆大人唔食牛佢就揀咗北海道四元豚壽喜燒套餐！啲豚肉睇落去都好柔潤好肥美喎。 呢個咁靚仔嘅師傅就係嚟自日本福岡嘅資深日籍主廚久家弘一先生，佢今日就係會用靚和牛配搭佢嘅獨門醬汁，又睇吓會帶俾我哋乜嘢驚喜先。 套餐除咗有靚肉之外仲有野菜，入面都有好多款式啱晒鍾意食菜嘅老婆大人。 話明慶祝梗係要整返枝靚酒啦！揀咗呢支初孫魔斬生配純米本辛口，呢個比較辛口同埋味道濃香好啱用嚟配肉飲。 每份套餐都會有前菜、茶碗蒸、野菜、味噌湯、漬物、米飯同埋甜品，所以絕對唔使擔心唔夠飽。 另外仲會跟咗四款唔同嘅醬料有松露醬、柚子醬、Wasabi同埋辣椒圈，如果你鍾意食多啲唔同嘅口味可以用嚟配肉食。 至於前菜都唔hea日式昆布煮就留俾老婆大人！我就最鍾意整得勁入味嘅和牛煮牛蒡，另外嗰碟青瓜雞皮估唔到口感咁過癮。 茶碗蒸整得好嫩滑仲有隻大蝦喺入面，原來啲蛋入面仲加咗明太子個味道即刻豐富咗。 味噌湯唔係我杯茶送埋俾老婆大人飲嘻嘻！ 食壽喜燒一碗靚嘅米飯絕對唔少得！呢個飯有咬口得嚟好黏咀仲好有米香添。 呢個時候主廚開始為我哋煮靚肉！佢先用啲新鮮牛脂起鑊然後落佢嘅獨門醬汁，就可以開始煮北海道嘅四元豚肉。 然後佢仲會將啲野菜落埋鑊索埋啲肉汁應該會勁好食。 老婆大人超好請咗件豚肉我嘆！用又香又甜嘅壽喜燒汁煮成嘅豚肉好有趙口，加埋啲日本蛋嚟食滑嘟嘟幾唔錯。 不過始終我都係牛魔王當然係最期待食主廚煮嘅和牛壽喜燒啦。 睇住師傅煮嘅期間就食咗呢個勁好味嘅菜之花！佢係菜心加西蘭花嘅混血兒口感好爽仲好有菜味勁正呀！ 先嘆咗呢件香川橄欖牛！呢隻食橄欖大嘅牛仔雪花分布平均，咬落去口感好軟嫩又多汁基本上唔使點咬已經喺個口度溶化勁好食。 呢件係日本牛女京都姬牛！呢條女又係香軟嫩滑嘅朋友牛味仲好香濃食得好舒服。 食完咁正嘅牛之後仲有個甜品等緊我哋！呢黑芝麻奶凍勁香黑芝麻味而且唔會好甜，就算唔係太鍾意食甜品嘅我都覺得好味，甜甜蜜蜜真係好啱情人節食呀。