又食日本嘢！

放大假梗係約朋友去食飯啦！我哋就最鍾意食日本嘢一於去鵜舞食日本料理啦。 呢晚人多可以放肆咁叫嘢食！嗌到一枱都係正嘢真係睇見都開心。 呢個係靜岡沙甸魚苗薄脆，啲魚苗壓扁之後攞去燒到脆卜卜，食落夠晒香口用嚟送酒一流。 鵜舞沙律入面有吞拿魚、薯仔同埋雞蛋沙律各一球，加埋啲新鮮嘅沙律菜同車厘茄，睇落好似好簡單但係又好好食喎。 呢個燒厚揚豆腐係老婆心愛之物梗係要叫番份佢嘆吓啦！豆腐燒到外面煙煙韌韌入面仍然滑嘟嘟，一邊係醬油味另一邊係木魚味兩個味都好得。 鰻魚玉子燒個蛋整得好香滑，入面包住咗啲鰻魚肉食落去特別香口。 鮪魚中卷同埋鵜舞卷有紫菜要交俾朋友同老婆大人食晒佢！ 呢度嘅串燒咁出名點可以唔食呀！我哋叫咗呢個炭火燒日本鰻魚串係呀又係鰻魚！因為我老婆大人最愛食嘅就係佢哈哈，燒到魚肉啱啱熟食落去好彈牙，冇多餘嘅醬汁食到魚嘅鮮味好正斗。 天婦羅都係唔可以唔食嘅正嘢！懶係健康叫咗個野菜天盛入面有南瓜、番薯、小青椒同埋香菇，天婦羅嗰漿好薄好脆加上新鮮嘅蔬菜食落好清爽。 我嚟呢度最期待嘅梗係食燒牛肉啦！呢個澳洲和牛燒嘅外層夠焦香入面仲係粉紅色㗎，食落去有濃濃嘅炭香真係好吸引。 大食嘅我梗係要整個飯食先得啦！鵜舞釜飯一煲入面有齊干貝、海膽、蟹肉、帶子、三文魚同埋三文魚籽好鬼豐富。 米飯煮到口感啱啱好加上鮮味嘅配料好食到唔停得口呀。 甜品就有呢個亮晶晶嘅水信玄餅，食嘅時候大家要小心唔好似我咁索咗黃豆粉入喉嚨俗到氣咳！透視感十足嘅水信玄餅口感好滑，加埋黑糖漿同黃豆粉一齊食唔會太甜，就算唔係幾鍾意食甜品嘅我都like佢。