有型嘅地方

同朋友食tea，佢其實嚟個好幾次，但因為真係好，所以覺得嚟過可以再嚟，我就跟佢嚟下啦。 我係嗰種叫恆隆做松板屋，叫Fashion walk做大丸嘅老式人，Tower535係以前總統大廈嗰個位，話就話係on謝斐道，呢間店舖門口係on景隆街嘅。 裝修得好靚好別緻，一間食肆居然有一啲書卷嘅氣息，餐牌都整成書咁樣樣，食物或者飲品嘅種類就分成一個個chapters. 點餐嘅時候店員非常細心，會禮貌地俾啲適切嘅意見你，例如你要嘅飲品同你點嗰啲食物會唔會因為味道方面冇咁夾，睇你有冇需要改變你所揀嘅飲品。呢點我好欣賞，因為有好多食肆嘅店員見叫嘅嘢飲嘢食唔夾但係就話之你。 我哋點咗香辣脆炸蓮藕薄片、士多啤梨玄米奶昔、龍眼果肉沙冰梳打、茶味焦糖布丁。好美味，我特別推介嗰個蓮藕薄片，店員話呢個係一個比較重味嘅嘢嚟嘅，其實比較適合配酒類嘅飲品，因為朋友原先揀嘅咖啡係非常甜嘅，或者就冇咁適合，如果係一啲non alcohol drinks但係清爽嘅都冇問題嘅。 不過咁喎，我食同飲嗰啲我覺得好味啫，其他食客唔知覺得點呢？因為我見到有一檯個靚女嗰份係all day breakfast嚟嘅，佢食剩嘅比食咗嘅部份多，跟住佢哋就走咗喇。細食就唔好叫all day啦好心，抑或佢覺得唔啱食呢？又或者佢純粹想order呢份食物係為咗打卡呢？女孩子好難捉摸呀真係。