屯門碼頭區少有的氣質cafe

喺屯門區要搵食通常都係去市中心同虹橋，而屯門碼頭嗰邊唔係話冇地方食嘢，但有特色嘅就乏善可陳...... 有朋友話今日過嚟呢邊海邊影相，絞盡腦汁，我終於搵到呢一間By the tray同佢lunch. 其實人哋係賣特色咖啡嘅，食物方面唔算好多選擇，但樣樣整得標緻，適宜打卡，但並非得個樣，係整得好好味，你食過係feel到佢製作有誠意。 朋友嗰份tiramisu餅底係croissant嚟嘅，即係好似而家時興嘅croffle咁，感覺特別。佢甜品當主菜食啦。我就一本正經地叫咗溫泉蛋卡邦尼配雜菌，十分香滑。飲品我要咗番石榴梳打，清新微甜，我都好鍾意。朋友飲個杯係dirty嚟，但睇佢個樣，都唔係好dirty啫😂😂😂。我記得喺度飲過橙啡，其實我有推薦佢去試，因為我諗橙啡嘅味道，同佢食嘅tiramisu都夾，但佢冇理我囉😮‍💨。