【四國 德島 大步危】日本四國之旅！來到德島縣大步危，當然不能錯過日本三大秘湯－祖谷溫泉！整個旅程我最期待就係住這間新祖谷溫泉飯店蔓橋 （新祖谷温泉　ホテルかずら橋）～開頭我都心大心細諗緊住有私人纜車比住客上山露天風呂嘅和之宿，定係住主打德島端燒燒鄉土料理嘅祖谷美人，後來比我發現到新祖谷溫泉飯店蔓橋有齊兩樣，立即二話不說訂房！ 《交通》 我哋唔係自駕，不過就啱時間都會有巴士直達酒店門口。否則JR大步危站都可以乘坐的士，網上見到車費約3000yen。 《溫泉》 酒店有內湯及天空風呂。天空風呂需要乘坐酒店私人纜車上山，風景一流！ 我冬天去其實都唔會好涷，浸完溫泉全身好暖，更加唔使擔心添！ 上面除咗男湯女湯，仲有足湯。 最特別係仲有一間日式小房子，可以浸完溫泉入去，圍住炭爐呷茶取暖。 如果唔想同人一齊浸，山上仲有貸切風呂（2200yen／40min）！ 夜晚睇景睇得唔係咁清楚，所以我6am都起身再浸多次，望住天黑到慢慢天光，好療癒。 早上一個人都冇，所以可以影到入面張相比大家睇～ 聽講某D月份，早上可以睇到雲海添！ 除咗搭纜車，都可以行呢個散步道上去天空風呂。 內湯嘅泉水其實同山上嘅一樣，只係景觀無咁好，不過內湯入面嘅護膚品以及梳洗用品就比較齊全。 《特別活動》 新祖谷溫泉飯店蔓橋限定活動，每晚8am酒店都會有車接送，欣賞蔓橋及琵琶瀑布夜間點燈。 《房間》 房內有廁所之餘，仲有浴缸。   《設施》 呢間酒店超正係免費用洗衣機+乾衣機，仲有幾部按摩椅免費使用，溫泉後可以繼續放鬆！ 《服務》 酒店職員普遍英文都唔係好叻，但全部都好好笑容，服務超級殷勤。一去到已經見到歡迎牌有我哋個名！   Checkout時有個職員唔單止幫我哋攞行李過對面馬路等巴士，仲等埋巴士到幫我哋攞上車，甚至幫我哋同司機講去邊！臨走仲送咗一包糖果比我哋！   《膳食》 下一篇再詳細講！ 【四國 德島 大步危溫泉酒店推介】新祖谷溫泉飯店蔓橋 膳食篇