清爽雪葩

對啲凍嘅甜品，我係冇抵抗力嘅，除咗雪糕，雪葩都係一樣超正嘅嘢。我噚日行過一間唔係主流嘅超級市場，見佢竟然有賣啲雪糕雪葩雪條出面唔常見，但口味吸引，又唔貴就買來試吓。。DaDino呢個牌子係出自da dolce嘅，我聽過佢哋大名好耐，之前七仔便利店亦賣過其中某幾個特別口味，當時我冇買到，一直唔知到底佢食唔食得過，今次終於買到，而且好多口味俾我揀𠻹！ 我見59蚊有4杯，咁都係十幾蚊杯啫，就算唔好味都不至於肉赤啦，咁就要咗圖中嘅檸檬雪葩、黑芝麻雪糕、伯爵茶雪糕、開心果雪糕。 首先就係食呢個檸檬雪葩，啊，好清新，酸咪咪嘅感覺好啱夏天，由於佢係雪葩，因此較為冰感，唔同雪糕偏向奶同cream嘅感覺，對於成日覺得就快熱死嘅我嚟講呢個冷冰冰唔黐𣲷𣲷嘅感覺更加正同消暑。 另外今日我都食咗另一杯，伯爵茶，我都好喜歡，茶味甘香，唔會太甜，又唔會澀，亦都偏向爽嘅感覺。另外兩個味我交咗俾我爸食，我哋有交換食一羹對方嗰杯。佢鍾意自己食到嗰兩款味多啲，而我又喜歡我自己食到嗰兩杯嘅味多啲。幾好，各取所需。 #世一千層蛋糕