打卡爆燈下午茶

Tiffany Blue Box Cafe的三層架下午茶賣相精緻打卡度高，味道又唔錯，所以就決定試下，順便上網打下卡威威。搵左個星期六去試，果然唔錯，值得推介。首先餐廳附近人流唔多，夠清靜唔怕嘈。粉藍色(Tiffany Blue)的裝潢有夢幻的感覺，少女心即時浮現。 食物分鹹甜點，既高貴又高質。最上層的是甜點，共有5款。有Tiffany珠寶店的標記迷你Blue Box粉藍禮物盒榛子脆脆朱古力蛋糕；靚靚花形在頭頂的水蜜桃泡芙；充滿熱帶風情的芒果椰子達克瓦茲；撻皮好酥脆的焦糖白芝麻朱古力撻，同埋幾可亂真的鳥巢朱古力蛋。真係款款都好吸睛，精緻到唔捨得食。 中層係鹹點，共有4款。先來個士多啤梨凍湯，酸酸甜甜的很開胃。其他鹹點包括以Tiffany鐵盒盛載的洋甘菊啫喱松葉蟹盒子；以鮮果點綴的鵝肝慕絲酥皮，同埋豪華的魚子醬波士頓龍蝦撻，粒粒新鮮魚子鋪滿半個撻面，非常足料。款款都名貴高級，可以享受下做上等人的一瞬間。 最下層係三層架必有的英式鬆餅，呢款有點特別，係蒜味加鹽味，配奶油忌廉、蕃茄果醬同蜜糖珍珠。蕃茄果醬清新鮮甜，蜜糖珍珠有咬口，鹹甜交雜，無論哪款醬都和鬆餅很夾。另外，大多數三層架下午茶都配有四件鬆餅，但這個set只有兩件鬆餅，另外兩件是鬆脆香甜的法式杏仁蛋糕，既可讓我多試一款高質食品，又可避免一人吃兩件鬆餅容易飽滯，留空間充份品嚐各款美食，真係好貼心的配搭。 總括來講，這裡有舒適安靜的環境，有柔和夢幻的佈置，又有精緻美味、食得又睇得的打卡食物，係我去過最歎最relaxing最爆燈的打卡地方。 #社群歎世界 #打卡相我攞獎