超強海鮮陣容 無敵尖沙咀景色 埋單$500 @ The Haven ( 尖沙咀YMCA )

似乎都有好一段日子沒跟大家分享Buffet體驗，其實近排都食過幾間性價比好高，而大家又未必去過既餐廳。 今次就同大家走訪位於尖沙咀既YMCA酒店。 其實早前都同大家介紹過大堂的Mall Cafe，水準不錯，想不到自助餐是更受歡迎。 餐廳呈長條形基本上大部分位置都能看到街景，有笑說同旁邊半島酒店是同一靚景。 有時候食自助餐大家都在搵回本位，其實有時候啱食仲緊要。 係香港食自助餐多數都係例湯加燉湯，而特登開個位煮湯又真係好少見，而且用到咖啡界先有既虹吸手法處理海龍皇湯，就更加吸睛，雖然都係噱頭，但個湯真心好飲，濃稠的蝦香味，好明顯用炒過既蝦殼去煮，當日我至少飲了三碗。 海鮮 莫以為$500左右，海鮮唔慌會多，波士頓龍蝦、龍蝦鉗、雪場蟹爪及琵琶蝦任食，尤其是有琵琶蝦更加少見，質素都不錯，自己都喪食幾隻。 其他海鮮小龍蝦、藍貝、青口、海蝦、翡翠螺及花蛤，前前後後總共十款，係自助餐中可說是少見，而且refill得幾快，值得一讚。 慢煮鮑魚 又係任食，以日本醬油慢煮好軟稔入味。 Carving Station 東星班片及鐵板虎蝦是即煎，而且煎得啱啱好，不錯。 另外有燒T骨羊扒及燒美國肋骨牛肉。 刺身及壽司 有八爪魚、希靈魚、三文魚、鯛魚及雜錦壽司，種類不多，質素還是可以。 熱葷 喇沙湯麵 已很久沒在自助餐中見了，其實湯底好香，配料豐富，有蝦仁、雞蛋、魚片、豆卜、魷魚仔及芽菜，油麵夾雜米粉個人好鍾意，但略嫌辣度太輕了。 再臨閣既熱葷其實幾合自己口味。 無生蠔都可以有芝士焗蠔，微焦的芝士蓋過了蠔肉，食落口感豐腴。 而龍蝦鉗伊麵又係必食，龍蝦鉗大大隻好多肉，撈落伊麵食一流。 好少見自助餐有避風塘蟶子，雖然並非蟶子皇級別，但總比一般的大隻，辣辣地好惹味。 不過西班牙海鮮飯就比較軟熟，可能要遷就大眾口味吧！始終個人喜歡al dente的質感。 至於其他熱葷有砵酒燴牛面頰、蒸比目魚、酥炸軟殼蟹、脆椒麻香魚仔、燒新薯及蒜子娃娃菜。 湯 中湯是沙參玉竹豬骨湯，好有家庭湯水感覺，而西湯是煙肉雜菜湯，好鐘意雜菜粒煲到好稔，甜味都溶化在湯裡。 冷盤 個人幾鍾意南京鹽水鴨，有嚼口，不會過咸。 而煙三文魚有油香，煙燻味恰好。 仲有韓辣醬八爪魚仔、烤芝麻吞拿魚、水晶肴肉、日式溫泉蛋同櫻花蝦豆腐。 沙律及芝士 食得健康的朋友有珍珠帶子脆麥火箭菜沙律、青木瓜海鮮沙律、三文魚藜麥沙律。 而芝士拼盤包括了車打芝士、藍芝士、金文畢芝士及高達硬芝士及黑松露蜜糖伴芝士。 甜品 先講雪糕有哈根大師，當中有Blooming Blueberry Tart、Macadamia Nut 及 Matcha Green Tea，味道都比較特別，對於食慣雲呢拿朱古力的朋友，不妨試試。 老實講，再臨閣甜點師傅真係有料到，幾款以海洋作主題的蛋糕都栩栩如生，現場幾位少女竟然話唔想整爛個蛋糕。 海鹽貝殼馬德琳、海鹽牛油蛋糕、珍珠馬卡龍及杏仁蛋糕，睇賣相已經覺得係藝術品，味道亦都不錯，甜度啱啱好。 喜歡的大可自行美化Croffle 。 仲有熱辣辣既心太軟。 其他甜品有朱古力慕絲、朱古力杯子蛋糕、木糠布甸、蝶豆花牛奶布甸、牛角包布甸、彩虹Jelly及紫米露，可說是貴精不貴多。 每晚大約7點半左右會有即場火焰雪山提示，好有懷舊氣息。 水果 有西瓜、蜜瓜、哈蜜瓜及菠蘿四款。 飲品 除了任飲咖啡及茶之外，仲有自家製青梅綠茶及蘋果汁，其實個青梅綠茶又幾好飲喎。 Facebook 專頁 : The Haven 地址 : 尖沙咀梳士巴利道41號香港基督教青年會南座4樓   電話 : 2268 7818   味道 : 4  環境 : 4  服務 : 5  衛生 : 4    抵食 : 5  位置 : 5   IG : foodiephilip   小紅書 : 美食焚化爐   希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!   http://www.facebook.com/foodiephilip #尖沙咀 #酒店 #YMCA #自助餐 #酒店餐廳 #美食焚化爐 #BUFFET (此文章由U Blog 同步發佈至社群)