【油尖旺區】【火水爐冰室火鍋】

【油尖旺區】【火水爐冰室火鍋】我上司升走咗，去咗第二度做嘢之後，我耐唔時都會同佢食吓飯。然而佢好多嘢都唔食，所以最適合就係搵間任飲任食火鍋，想食乜就叫乜，咁就最好喇。見到旺角呢間火鍋店下午都有開，啱晒我哋，咁就走咗去食喇。 我哋去嘅時間仲係午市，可以揀 90 分鐘嘅「花膠火鍋餐」或者 120 分鐘嘅「雞煲+花膠火鍋餐」，揀咗後者先知佢有埋雞煲咁正。出到嚟個雞煲只屬正常水準，冇乜特別，不過冇預佢有就當係一個 bonus 啦，心理上好過啲。 套餐方面我哋揀咗最平嘅「黑毛豬餐」，可以任食黑毛豬同埋多款火鍋配料、餐前小食、飲品、甜品等等。冇牛食唔緊要，反正我上上司都唔食。前菜嚟咗個「麻辣涼拌皮蛋」，味道唔錯喎，皮蛋選料唔差得嚟辣汁夠惹味。 湯底我哋揀咗「胡椒豬肚花膠鍋」，有兩大片花膠畀我哋一人一片，之後就到火鍋料嘅時間。黑毛豬都有豬味，唔錯，而紫菜響鈴同脆炸響鈴就好似係有紫菜版好食過冇紫菜版。雞蛋一份有兩隻，做蛋汁或者煮蛋都可以。 午餐肉係長城牌圓罐嗰隻，鵝腸、魚皮餃好食，芫茜、豆卜就都係咁。油麥菜、涼瓜同紫洋蔥與我無關，炸魚皮同炸枝竹正常，牛柏葉、蟹柳、雲呑、水餃都係普通料。牛丸、魚蛋、水魷、爆漿魚丸就車仔麵料 feel。 嘢飲方面，免費嘢都係汽水或者楊協成，我飲晒咁多款楊協成，都係好甜嘅。甜品有一人一杯嘅 Movenpick 雪糕，可以揀呍呢嗱、朱古力或者楓糖合桃，我哋揀晒後者，不過都係偏甜啦。埋單兩位 $502 落樓，合理而冇特別。。。 （地址：旺角煙廠街33號朗廷軒1樓） #1amfoodie #foodie #hkfoodie #thatfoodiething #globaleats #food #followforfollowback #love #eat #1am油尖旺區 #旺角東 #旺角 #油麻地 #火水爐冰室火鍋 #火水爐 #火鍋 #任飲任食 #黑毛豬餐 #花膠火鍋餐 #雞煲 #黑毛豬 #火鍋配料 #皮蛋 #胡椒豬肚花膠鍋 #紫菜響鈴 #鵝腸 #魚皮餃 #Movenpick #1am0917 #1ambackup