Mt. Yashima 2024/05/14

高松最美夜景 - 屋島全新展望台

上年十一月去高松嘅時候,一落機第一個行程就係去屋島,喺獅子の霊巌展望台俯瞰高松市同瀨戶內海。上到山嘅時候已經入黑,我哋一家四口摸黑穿過四國八十八靈場之一嘅屋島寺,迎面而嚟嘅就係令人驚喜嘅夜景!高松喺香港人眼中絕對唔係大城市,但正正係呢一種小城市平坦嘅建築景觀,形成另一種令人讚嘆、唔常見嘅夜色。居高臨下,望住平靜止息嘅城市,呢個彷彿相片嘅景象深深刻印喺我哋腦海之中,我哋一家四口行程第一日已經愛上咗呢個地方。 但屋島嘅驚喜遠遠唔止夜色。喺觀景台旁邊嘅屋島山上交流拠点施設,係2022年先落成嘅建築大作。呢一個充滿弧度嘅觀景回廊,仿似以建築設計嘅美學同戶外嘅浪漫夜色爭艷鬥麗,令人唔知道應該將眼球聚焦喺邊一個方向。錦上添花嘅係佢戶外嘅楓葉,夜楓配上遠處繁榮嘅城市燈光,絕對比得上寒霞溪、栗林公園嘅著名賞楓景點。城市嘅夜色、滿紅嘅楓葉、建築嘅美學互相襯托,形成屋島山上一聲又一聲讚嘆。 大概要成就一個難以忘懷嘅景點,注定要涉及一些遺憾。可惜上山時間夜晚,未能透過面向西面嘅瞭望台欣賞斜陽落下。若然配上黃昏晚霞,伴隨夜幕徐徐降臨,實在係難以想像有幾咁美麗、讚嘆。再加上附近未有參觀嘅屋島寺、著名平原大戰嘅歷史為止等等,通通都留低一條尾巴,令我再次前往屋島探索呢一個被低估嘅山頭。或者下次我可以下午就上山,喺屋島山上交流拠点施設嘆一嘆下午茶,再去附近屋島寺、平原大戰遺址探索,然後靜待夕陽映照嘅來臨,再次欣賞呢一個令人難以忘懷嘅風景。 #日本好去處#旅行打卡#旅遊行程#求好旅友#高松#四國#四國旅遊

地址
Mt. Yashima
Mt. Yashima, Yashima Higashimachi, Takamatsu, Kagawa 761-0111日本
評分
5/5
😍
期待你嘅下次分享👍🏻歡迎互相關注下💖
下一篇載入中